మామూలుగా మనకు పరిచయం ఉన్న వ్యక్తులను ఏదో ఒక వరుసతో పిలుస్తాం. అదే ఏమాత్రం పరిచయం లేని వ్యక్తులను ‘ఆంటీ’ లేదా ‘అంకుల్’ అని పిలవడం చాలా కామన్. సెలెబ్రిటీల కుటుంబాలు పరస్పరం కలుసుకున్నప్పుడు ఈ సంబోధనలను వింటూనే ఉంటాం. అయితే, ‘ఆంటీ’ లేదా ‘అంకుల్’ అని పిలుపు.. కొంతమందికి ఏమాత్రం రుచించదు. ఏమీ అనలేక మౌనంగా ఆ పిలుపును భరించే వారు కొందరైతే, ‘అలా పిలవొద్దు’ అని ప్రత్యక్షంగానో లేక పరోక్షంగానో సున్నితంగా తెలియజెప్పే వారు మరికొందరు.
అయితే.. ఈ తరహా సంఘటనే ఎయిర్‌పోర్టులో కేంద్ర మంత్రి స్మృతీ ఇరానీకి ఎదురైంది. స్మృతీ ఇరానీని బాలీవుడ్ యువ బ్యూటీ జాన్వీకపూర్ కలిసింది. ఇద్దరూ పరస్పరం పలకరించుకున్నారు. సరదాగా ముచ్చటించుకున్నారు. అయితే, ‘ఆంటీ.. ఆంటీ’ అంటూ జాన్వీ సంబోధించడమే స్మృతి ఇరానీకి ఇబ్బంది కలిగించింది. ఈ విషయాన్ని స్మృతీ ఇరానీ ప్రస్తావిస్తూ ఓ పోస్ట్ చేశారు. జాన్వీకపూర్ తనను మాటిమాటికీ ‘ఆంటీ’ అని సంబోధించిందని, ఆ తర్వాత అలా పిలిచినందుకు ‘సారీ’ కూడా చెప్పిందని పేర్కొన్నారు. అందుకు, తాను స్పందిస్తూ ‘ఏం ఫర్వాలేదు బేటా..’ అని చెప్పానని తెలిపారు. తనను అలా ‘ఆంటీ’ అని పిలుస్తుంటే ‘ఎవరైనా నన్ను షూట్ చేయండి’ అని అరవాలనిపించిందని స్మృతీ ఇరానీ చెప్పుకొచ్చారు.
